D tabṛat i:

Komisiono pri Azia Esperanto-Movado (KAEM) de Universala Esperanto-Asocio (UEA)

Akked:

Tutmonda Esperantista Junulara Organizo (TEJO)

Massaw, massawat:

Nekkni, s wid ay yestenyan da, d imsiwlen n tesperantot akked yemdanen ay ibedden s idis n yiɣerfan ay yettwaḍelmen deg umaḍal, ladɣa akked weɣref afalesṭini, seg melmi kan, yuweḍ-aɣ-d yiwen n yisali ay aɣ-yeswehmen, yesseḥzen-aɣ yerna yesserfa-aɣ, imi, ɣef leḥsab n yisali-a, iswiren (congrès) igraɣlanen n tesperantot n useggas n 2013 ad d-ilin deg Isṛayil: Aswir Asyawi n Tesperantot ad d-yili deg temdint n Lquds deg wayyur n Yebrir, ma d Aswir Agraɣlan n Yilemẓiyen ad d-yili deg temdint n Nnaṣira, deg wayyur n Ɣuct. La awen-d-nettaru s yisem n wakk imdanen ay yekkaten i lmend n talwit, n yizerfan n wemdan akked ussefɛel n lqanun agraɣlan, akk imdanen ay yettekkan deg tḥemlal n Uɣanzu, aḥbas n ussefti n yedrimen akked uɛaqeb n Isṛayil ɣef ljal n tuḍḍfa ay teḍḍef akal afalesṭini, tessehrest-it (coloniser) yerna tḥettem-d fell-as anagraw (système) n apartheid.

Asmi ay d-tennulfa Isṛayil s yimenɣi, deg wakal afalesṭini, deg 1948, ugar n 750.000 seg yimezdaɣen ineṣliyen n Falesṭin ay yettwaẓẓɛen, nnig waya, seg wass-nni ar ass-a, Isṛayil terra ddaw uḍar-nnes aɣref afalesṭini, yerna tḥettem-it ad yedder ddaw tuḍḍfa (occupation) ay yeffɣen i lqanun, d tuḍḍfa d-tessummlent (dénoncer) aṭas n tneɣtusin (résolutions) n Yeɣlanen Yeddukklen (Nations Unies). Iduba (autorités) isṛayiliyen meḥqen Ifalesṭiniyen s wakk leṣnaf n lbaṭel yerna, d amḥaq aydeg ttwaɛefsen yizerfan n wemdan taɛinanit. Deg mraw (ɛecṛa) n yiseggasen-a ineggura, iserdasen isṛayiliyen nɣan ugar n 10.000 n Yifalesṭiniyen ay yemmuten s uḥakeṛ neɣ s ujemmal. Yerna ass-a, mazal llan yigiman (luluf) n yimeḥbas isertiyen ifalesṭiniyen ay yettwaḍḍfen deg leḥbas isṛayiliyen, amur ameqran seg-sen d imeḥbas kan n tedbelt (administration), werɛad ur ɛeddan deg ccṛeɛ, yerna ur ẓrin d acu ay d tasebba n weḥbas-nsen. Isṛayil tezga tettɛettib imeḥbas, yerna ar ass-a werɛad ur testenya Amtawa Agraɣlan mgal uɛetteb, d amtawa ay stentyant yagi 153 n tmura.

 

Tuḍḍfa ay teḍḍef Isṛayil akal afalesṭini d ayen ay yeffɣen i lqanun. Isṛayil teḍḍef Agemmaḍ Utrim (aɣerbi), Ɣezza ed Lquds Tagmuḍant (tacerqit), rnu-as akal asuri n Julan. Nnig waya, deg wakk ikallen ay teḍḍef, Isṛayil teḥṛes imezdaɣen, ur ten-tettajja ad wliwlen akken ay asen-yehwa, ɣas akken ikallen-a zgan-d beṛṛa i tlisa tisṛayiliyin. Gar tsertiyin n lbaṭel ameqran ay tettḍafar Isṛayil, ad d-nebder: lebni n weɣrab n tukksa n wakal akked umeḥyaf deg Ugemmaḍ Utrim – Axxam n Ccṛeɛ Agraɣlan n La Haye yenna-d aɣrab-a yeffeɣ i lqanun; lebni n tehrast (colonies) timaynutin deg Ugemmaḍ Utrim; ahuddu n yexxamen n Yifalesṭiniyen deg temdint n Lquds; akked tergult (blocus) aydeg ddren umelyun ed wezgen n Yifalesṭiniyen deg Tesfift n Ɣezza.

 

Nnig waya, Isṛayil tugi ad testeɛṛef s wezref n tuqqla n 6 n yimelyunen n Yifalesṭiniyen ɣer tmurt-nsen. Ifalesṭiniyen-a atni ass-a ddren d izruzaɣ (réfugiés), aṭas seg-sen ddren deg lḥif, deg yegriren (camps), deg tmura ay d-yezzin i Falesṭin. Isṛayil ur tebɣi, daɣen, ad d-qqlen yigiman-nni (luluf) n yiminigen ifalesṭiniyen ay yeddren deg Tuṛuft, deg Yiwunak Yeddukklen ed waṭas n tmura niḍen wuɣur ay unagen akken ad nadin tameddurt yelhan. Seg tama niḍen, ɣas ma llan amelyun ed wezgen n Yifalesṭiniyen ay mazal ddren sdaxel n Isṛayil, imdanen-a atni ddren ddaw temsirit (racisme) n tsuda (institutions). Wi d arraw n twaculin-nni tifalesṭiniyin ay iselken seg ussenger n tgara n yiseggasen n 1940, yerna ssawḍen ad qqimen deg wakal aydeg ay d-sbedden yiṣehyuniyen awanak (ddula) n Isṛayil. Ifalesṭiniyen-a ttgensisen-d (représenter) ass-a 20% seg yimezdaɣen n Isṛayil, d acu kan, ur sɛin izerfan iɣarimen (civiques) am wakken ay ten-sɛan Yisṛayiliyen udayen, am wakken ur ɛdilen akked wudayen deg yinurar n usselmed, idles, tutlayt, axeddim, timetti neɣ tadamsa. Ttwaḥettmen ad ddren deg umeḥyaf imi kan ur llin d Udayen, ur llin d arraw n Wudayen.

Imi timetti tagraɣlant (communauté internationale) ur tezmir neɣ ur d-teclig seg uḥuddu n Yifalesṭiniyen ed weḥṛas n Isṛayil akken ad tqader lqanun agraɣlan, ugar n 170 n tuddsiwin (organisations) tifalesṭiniyin n yizerfan n wemdan, tuddsiwin tirnabaḍin (non-gouvernementales) ed tiddukliwin tidelsanin ed tsadarin (professionnelles), akked yenmula (syndicats) bdan-d, deg 2005, yiwet n tḥemla tagraɣlant n Uɣanzu, Aḥbas n Ussefti n Yedrimen akked Uɛaqeb n Isṛayil (BDS – Boycott, Divestment and Sanctions). Bɣan ad ḥeṛsen Isṛayil s tḥemla-a arma d asmi ara teknu ddaw lqanun agraɣlan. Ta d taḥemla tagraɣlant n yemdanen n menwala, d taḥemla ay iḍefren abrid n talwit yerna tessutur izerfan ay yeḍmen lqanun. Taḥemla-a d tin ay iḍefren abrid n tḥemla-nni n uɣanzu ay iḥeṛsen Tafriqt n Wenẓul armi d asmi ay tejja anagraw (système) n apartheid.

Isdawanen ed wid ay ixeddmen deg yedles tturaren dduṛ d ameqran deg tḥemla n BDS. Aseggas uqbel ma tebda-d tḥemla-a, deg 2004, tebda-d yagi yiwet n tḥemla tasdawant-tadelsant i uɣanzu n Isṛayil. Deg tidet, yezmer ad yettwasseqdec yedles i lmend n tezniwt (propagande), tasnakta (idéologie) ed tsertit. Yerna Isṛayil d yiwet seg tmura aydeg idles yetteddu ddaw tecḍaḍt n tsertit n unabaḍ. Anabaḍ isṛayili yettṣerrif aṭas n yedrimen akken ad yazen inuẓar ed waggagen (intellectuels) isṛayiliyen ɣer wakk timiwa n umaḍal. Isṛayil tettṣerrif daɣen akken ad d-teg tidyanin tidelsanin neɣ tinuẓar tigraɣlanin deg Isṛayil, d tidyanin aydeg ay d-tɛerreḍ inuẓar ed waggagen ladɣa seg Tuṛuft, seg Yiwunak Yeddukklen ed Temrikt Talatinit.

Isṛayil tesɛa asenfar (projet) adelsan umi tsemma “Brand Israel” (Tameṛka n Isṛayil), yerna imḍebber n usenfar-a d aneɣlaf isṛayili n tɣawsiwin n beṛṛa ed yedles. Asenfar-a sbedden-t-id deg 2006, yerna iswi-nnes ukcif netta d assizdeg n tugna n Isṛayil deg lbeṛṛani. D acu kan, asenfar-a yesɛa iswi niḍen, d uffir, netta d tuṣṣra n Isṛayil deg lbaṭel-nni ay tetteg deg Yifalesṭiniyen, d lbaṭel ayge ay teḍḍef akal ur yellin nnes, d win aydeg ur tettqadar lqanun ahraɣlan, yerna tneɣɣ medden war ma tettwaɛaqeb. S waya, Isṛayil tessekna idles akken ad yeddu ddaw tecḍaḍt n tezniwt-nnes (propagande) taṣehyunit, yerna ayen ara d-yesseknen aya d ayen ay d-yenna wenmazul n uneɣlaf (vice-ministre) n yimir-nni, Nisim Ben Shitrit, deg yiwen n weɣmis isṛayili: “Nettwali idles akked hasbara d allalen n tezniwt [propagande] ay yesɛan azal d ameqran. Nekk ur giɣ amgerrad gar yedles ed hasbara.” Yuɣ lḥal, ayen umi ttinin Yisṛayiliyen “hasbara” d leqdic-nni ameqran ay ttgen akken ad dafɛen ɣef tsertit tisṛayilit deg umaḍal, i wakken amaḍal ad asen-yefk lḥeqq ɣef lbaṭel ay ttgen deg Yifalesṭiniyen).

Aṭas seg yemdanen ay iqeddcen deg tẓuri ed yedles, seg wakk timiwa n umaḍal, ukin i taluft-a, yerna ugin taɛinanit ad ttekkin deg tedyanin tidelsanin ay d-yettilin deg Isṛayil yerna ddaw leɛnaya n yiduba isṛayiliyen. S waya, imdanen-a n tẓuri ed yedles qudren lewṣayat n tḥemla-nni n uɣanzu adelsan n Isṛayil. Aṭas n yinuẓar ed waggagen (intellectuels) seg waṭas n tmura, gar-asen llan ula d Isṛayiliyen ed Wudayen, nnan-d taɛinanit atni ttekkan deg tḥemla n uɣanzu adelsan i wakken ad ḥeṛsen Isṛayil ad tejj abrid-a n lbaṭel ay teḍfer. Gar tugniwin (personnalités) ay yettwassnen ttekkant deg tḥemla-a, ad d-nebder Elvis Costello, Emma Thompson, Roger Waters, Santana, Pixies, Mike Leigh, Ken Loach, Snoop Dogg, Damon Albarn, Klaxons, Jean-Luc Godard, Brian Eno, Yes Men, Cassandra Wilson, Peter Brook, Udi Aloni ed Devendra Banhart, akked yimura Iain Banks, Eduardo Galeano, Stéphane Hessel, Juan Goytisolo, Ilan Pappe, Naomi Klein, Henning Mankell, Mahmud Darwish, John Berger, Arundhati Roy ed Alice Walker gar wiyaḍ.

Ɣef leḥsab n Ronnie Kasrils, imḍebber aqbur n ANC (Aswir Aɣelnaw Afriqi) yerna d aneɣlaf aqbur n Tɣellist deg Tefriqt n Wenẓul, tagnit aydeg ddren Yifalesṭiniyen deg tmurt-nsen tɛedda i yir tegnit-nni aydeg llan ddren yiberkanen deg Tefriqt n Wenẓul ddaw udabu amesbaṭli n apartheid. Desmond Tutu, ameqran n yemḍebbren n teklizt deg Tefriqt n Wenẓul, yerna d win ay yuwyen Arraz n Nobel n Talwit, yerza yiwet n tikkelt ɣef Falesṭin, yerna yenna-d: “Deg tallit n apartheid, nenna-d ur yessefk ɣef yinuẓar igraɣlanen ad d-asen ɣer Tefriqt n Wenẓul, d tamurt aydeg lqanun iga ameḥyaf yerna yebḍa gar yiran [races], ihi ula ass-a, lemmer ad d-tas Tufiṛa [opéra] n Cape Town akken ad turar deg Isṛayil, aya ad d-yili d tuccḍa.”

Ussan-a, ssefrayen ad gen Aswir Asyawi n Tesperantot deg temdint n Lquds. Maca… yessefk ad teẓrem Isṛayil attan teḍḍef, war ma tquder lqanun, akk aḥric agmuḍan (acerqi) n Lquds, yerna ula d tamdint taqburt n Lquds tedda deg weḥric-a. Yessefk daɣen ad teẓrem aṭas n yexxamen ifalesṭiniyen ay ihudd udabu isṛayili n Lquds deg mraw (ɛecṛa) n yiseggasen ineggura. Yessefk ad teẓrem amɣiwan (lmir) n Lquds yefka ttesriḥ i wakken ad ttwaɣelqen yimezgunen, ammasen idelsanen ed wammasen n tsekla n Yifalesṭiniyen deg temdint-a, am wakken ay yefka ttesriḥ ad ttwaḥebsent tfaskiwin n uẓawan. Ula d tafaska tagraɣlant ay d-tga Tqenṣult Tabriṭanit akked Unesco deg Umezgun Aɣelnaw Afalesṭini n Lquds, uznen-as imsulta (ibulisen) ay tt-iɣelqen.

 Ihi akka ay iga lbaṭel aydeg ddren Yifalesṭiniyen deg tɣiwant n Lquds. D aya ay yessawḍen amedyaz isṛayili Aharon Shabtai, ad yagi ad yettekki deg tfaska tagraɣlant n tmedyazt ay tga Isṛayil deg Lquds deg 2006, yerna yenna-d: “Tanemmirt imi ay iyi-d-tɛerḍem, d acu kan, smenyafeɣ ad sefḍeɣ isem-inu seg wumuɣ n wid ara yettekkin. Ɣriɣ, deg wussan-a ay yezrin, ɣef lbaṭel yessexlaɛen ay d-yellan deg wemkan n ufettec n Qalandiya. Dɣa aql-iyi mgal n tfaska n tmedyazt ara d-yilin deg temdint aydeg Aɛṛaben ttwaḍlamen, ttwamḥaqen, ttwaḥbasen gar yiɣerban, ttwakksen-asen yizerfan-nsen ed yexxamen-nsen, sseɣlayen-asen s leqder-nsen deg yimukan n ufettec, d tamdint aydeg lqanun agraɣlan ur yettwaqadar. Ttwaliɣ ur yelli yessefk ɣef yimedyazen ad qqnen tiṭṭawin-nsen ɣef lbaṭel ay yeḍran deg yezri, yerna ur yessefk ad tent-qqnen ass-a ɣef lbaṭel ed umeḥyaf ay la iḍerrun s yisem n wemgerrad n yiran [races] neɣ n laṣel”. Dɣa ula d nekkni ad d-nini ula d imsiwlen n tesperantot ur yessefk ad qqnen tiṭṭawin-nsen ɣef wanect-a.

 Tidyanin tidelsanin tigraɣlanin ay d-yettilin deg Isṛayil, tesseqdac-itent Isṛayil, deg tidet, akken ad terr lbaṭel-nnes d taɣawsa n menwala, yerna ad tessizdeg tugna-nnes deg umaḍal. S waya, Isṛayil tebɣa ad teffer ameḥyaf-nni ay d-tḥettem ɣef Yifalesṭiniyen, akked tuẓẓɛa-nsen seg tmurt-nsen, taḥeqranit ay ten-teḥqer akked weḥsab ur tent-teḥsib.

 Nesḥissif imi ula d amussu n yemsiwlen n tesperantot yetteddu deg webrid-a. Amussi n yemsiwlen n tesperantot n Isṛayil, deg yeɣmisen-nnes ed yisalan-nnes ɣef yeswiren (congrès) ay itteg, qrib ur d-ibedder acemma ɣef weɣref afalesṭini ay izedɣen daxel tlisa n Isṛayil acḥal n leqrun aya, d aɣref ay yettwaẓẓɛen, ay yettwaḍelmen, ay yettwaḥeṛmen seg yizerfan yerna ssemẓin-as azal-nnes. Amussu n yemsiwlen n tesperantot deg isṛayil ur d-ibedder acemma ɣef yedles, iles, amezruy neɣ ula d tillin n weɣref afalesṭini. Ssawlane-d ɣef yedles ed umezruy n Wudayen, ssawalen-d ɣef yiles aɛebri, amzun Isṛayil d tamurt n Wudayen kan. S waya, tuqqna n tiṭṭawin ɣef Yifalesṭiniyen ed weḥqar-nsen d ayen ay yuɣen aẓar ula deg umussu n yemsiwlen n tesperantot deg Isṛayil. Deg weɣmis n Weswir n Tesperantot ara d-yilin deg Isṛayil, bedren-d ula d aḥric aqbur n temdint n Lquds akked Qumram (ay d-yezgan sdat Yilel Yemmuten) amzun d iḥricen seg Isṛayil, yili, deg tidet, imukan-a zgan-d deg wakal afalesṭini, yerna lejnas steɛṛfen s waya. Nnig waya, deg weɣmis-nni, ur d-bdiren yiwet n tɣawsa: i wakken ad ddun medden seg Lquds ɣer Qumram, yessefk ad kken seg yebriden aydeg ala Isṛayiliyen ay yesɛan azref ad ten-aɣen, ɣas akken ibriden-a zgan-d deg wakal ay yellan beṛṛa i tlisa n Isṛayil.

Aswir (Congrès Agraɣlan n Yilemẓiyen beddlen-as amkan yerna ssefran ad d-yili deg temdint n Nnaṣira (d tamdint tisṛayilit aydeg qrib akk imezdaɣen-nnes d Ifalesṭiniyen, ur d Udayen). Amazday (collectif) isṛayili n tesperantot yeqbel daɣen ad d-yessekcem kra n Yifalesṭiniyen n temdint-a ɣer Useqqamu Adigan (comité local) n Weswir-a. Aya amzun yesskanay-d abeddel deg tikli n umazday-a. D acu kan, taluft mazal werɛad tefri. Taḥemla Tafalesṭinit n Uɣanzu Asdawan-Adelsan n Isṛayil (PACBI) tettwali asmagnu (normalisation) n wassaɣen akked udabu isṛayili “d attekki deg kra n usenfar, ṛṛay neɣ axeddim, ama deg Falesṭin, ama deg lbeṛṛani, i lmend n ussemlili n yemdanen neɣ n tsuda tifalesṭiniyin (neɣ taɛṛabin) ed tisṛayiliyin, yerna iswi amezwaru n temlilit-a maci d imenɣi i lmend n Falesṭin ed wekcaf n lbaṭel n tuḍḍfa tisṛayilit”. Dɣa d aya ay bɣan ad t-gen s tesperantot: s kra n wemɛawen ara d-yilin gar Waɛṛaben ed Wudayen, yili izerfan n llsas n Yifalesṭiniyen ur steɛṛfen yes-sen, yesɛa kan yiwen n yisem: “ d asmagnu” (neɣ d tuṣṣra n tugna icemten n Isṛayil, d assizdeg-nnes, d tuṣṣra n temsirit akked apartheid).

Ɣef leḥsab-nneɣ, ur yessefk ad teqqel tesperantot d allal ara yettekkin deg umeḥyaf, aḍlam ed tukksa n yizerfan n kra n weɣref, yerna ur yessefk ad nefk afus deg wanect-a s tsusmi-nneɣ.

Ɣef waya ay nessutur seg-wen ad tagim ad d-yili Weswir Asyawi n Tesperantot ed Weswir Agraɣlan n Yilemẓiyen n 2013 deg Isṛayil, yerna, ma yella wamek, iswiren-a ad d-ilin deg tmurt aydeg ur yelli umeḥyaf gar yiran (discrimination raciale), d tamurt ay yettqadaren izerfan n wemdan ed lqanun agraɣlan.

S tegmat,

Iwakken ad testenyim tasakbabt-a ay yettwarun s tesperantot, sit da:

 

Iwakken ad testenyim tasakbabt-a ay yettwarun s tesperantot, sit da: 

http://www.change.org/petitions/esperanto-ne-estu-ilo-de-komplico-en-diskriminacio-kaj-subpremo-ne-organizu-internaciaj-kongresoj-en-israelo

Advertisements

Respondi

Fill in your details below or click an icon to log in:

WordPress.com Logo

You are commenting using your WordPress.com account. Log Out / Ŝanĝi )

Twitter picture

You are commenting using your Twitter account. Log Out / Ŝanĝi )

Facebook photo

You are commenting using your Facebook account. Log Out / Ŝanĝi )

Google+ photo

You are commenting using your Google+ account. Log Out / Ŝanĝi )

Connecting to %s